Тэма сексуалізаванага гвалту з’яўляецца сур’ёзнай праблемай сярод падлеткаў. Не кожны хлопец або дзяўчына мае дастатковы ўзровень ведаў, каб распазнаць непрыстойныя паводзіны з боку дарослых і абараніць асабістыя межы. Дапамагчы моладзі ўсвядоміць маштабы і важнасць гэтай праблемы можна праз бясплатную мабільную гульню на беларускай мове Red Cap Must Cry. Гульню рэалізавалі па рамане нямецкай пісьменніцы Беаты Тэрэзы Ханікі міжнароднай камандай, большую частку якой складаюць беларусы.
PALATNO паразмаўляла з распрацоўшчыкамі і даведалася, як гульня вучыць падлеткаў распазнаваць формы сексуальнага гвалту, усведамляць свае межы і паводзіць сябе ў такіх сітуацыях.
Змест
«Хтосьці прачытае кніжку, а хтосьці пагуляе ў гульню»
Асноўная мэта праекта, па словах стваральнікаў, як і ў рамане Беаты Тэрэзы Ханікі, — павысіць узровень ведаў аб праблеме, перанесці ў новы медыум і даць дапамогу ў распазнанні непрыстойных паводзін, у складанасці камунікацыі і абароны асабістых меж. Red Cap Must Cry — гэта таксама зразумелая для падлеткаў мова камунікацыі і канал, які дазваляе распаўсюдзіць важную тэму.
Карыстальнікі гульні пагружаюцца ў гісторыю дзяўчынкі па імені Мальвіна. Мальвіне трынаццаць гадоў, яна ходзіць у школу, любіць праводзіць час са сваёй лепшай сяброўкай Лізі. Мальвіна б’ецца з хлопчыкамі, катаецца на ровары, закохваецца, сварыцца са старэйшай сястрой і наведвае дзядулю, як Чырвоны Каптурок. Але за ўяўным дабрабытам хаваецца дзікая і страшная таямніца, якую дзяўчына баіцца расказаць нават самой сабе. Мальвіна з’яўляецца ахвярай дамашняга сексуалізаванага гвалту. Праз метафарычныя вобразы карыстальнікі гульні могуць пабачыць унутраны свет, перажыванні і праблемы дзяўчыны.
— Нам важна, каб людзі ведалі, што такое гвалт і што ён існуе, што ён вельмі часта адбываецца ў блізкім коле, дзе больш за ўсё даверу, і каб людзі ведалі як сябе паводзіць у такой сітуацыі. Як маніпулюе гвалтаўнік, як расказаць бацькам пра дзіўныя паводзіны свайго сваяка і наогул разумець і ўсведамляць свае межы. Хтосьці прачытае кніжку, а хтосьці пагуляе ў гульню — такім чынам мы зможам дацягнуцца да большай колькасці людзей або сямей, — падкрэсліваюць распрацоўшчыкі.
«Праз гульню здымаецца табу і напружванне вакол тэмы хатняга гвалту»
Сексуальны гвалт закранае значную частку моладзі. Па дадзеных СААЗ за 2022 год, кожны восьмы малады чалавек падвяргаецца сексуальнаму гвалту. Жорсткае абыходжанне з дзецьмі часта з’яўляецца схаванай з’явай. Толькі невялікая колькасць дзяцей, якія падвергліся гвалту, атрымліваюць медыцынскую дапамогу.
Паводле ацэнак міжнародных арганізацый, у сярэднім прыкладна адна з чатырох дзяўчынак і адзін з шасці хлопчыкаў у свеце зазнаюць тую ці іншую форму сексуалізаванага гвалта да дасягнення 18-гадовага ўзросту.
— Праблема існуе, і статыстыка вельмі сумная. Тэма ўсё яшчэ стыгматызаваная, няёмкая, а таксама часта ў грамадстве абвінавачваюць ахвяр у тым, што здарылася.
Па словах стваральнікаў, каб усведамляць праблему і яе прадухіляць, трэба спачатку пра яе казаць і разумець наступствы. Менавіта праз гульню можна здымаць табу і напружванне вакол тэмы дамашняга гвалту. Ён становіцца бачным, але не праз запалохванне і застрашванне, а праз перспектыву галоўнай гераіні і эмпатыю.
З аднаго боку, гульня вучыць распазнаваць толькі некаторыя формы сексуалізаванага гвалту, кажуць распрацоўшчыкі. Яна паказвае пры гэтым не толькі вонкавы бок — пацалункі дзядулі без згоды і жадання на тое галоўнай гераіні — але і перажыванні і тое, як гэта адбіваецца на думках, эмоцыях і камунікацыі з дарослымі. З іншага боку, гульня вучыць, як можна рэагаваць на такія паводзіны. Яна паказвае, што можна вырашыць сітуацыю, што важна казаць пра тое, што адбылося і шукаць таго, хто табе паверыць. Галоўны пасыл — дакладна і ясна даць разуменне і ўпэўненасць, што такія паводзіны не нармальныя.
Адкуль узнікла ідэя і хто яе рэалізаваў
Праект нарадзіўся пасля таго, як рэжысёр дакументальных і ігравых фільмаў, прадзюсар, сцэнарыст і канцэпт-мэйкер (імя і прозвішча не раскрываюцца ў мэтах бяспекі — заўв. PALATNO) прачытаў раман нямецкай пісьменніцы Беаты Тэрэзы Ханікі.
Рэжысёра захапіў раман пісьменніцы і ён вырашыў нейкім чынам увасобіць яго. Падчас каронавіруснай пандэміі з’явілася ідэя пра дыджытал-увасабленне: а менавіта — перфарматыўнай мабільнай гульні.
У камандзе таксама ёсць і псіхолагі. Яны стварылі бібліятэку, у якой сабралі адукацыйныя матэрыялы і практыкаванні на псіхалагічную тэматыку.
Аўтарам музыкі для мабільнай гульні з’яўляецца беларуская інды-поп спявачка Palina. Акрамя таго, яе голасам у беларускай і рускай версіях гаворыць гераіня Мальвіна.
Дзе спампаваць гульню, як яна працуе і што чакае карыстальнікаў у поўнай версіі
Red Cap Must Cry выйшла ў дэмаверсіі ў двух раздзелах толькі для мабільных прылад і даступная на чатырох мовах (беларуская, руская, англійская і нямецкая). Гульня цалкам афлайн — ніякага падключэння да сервера не патрэбна. Па словах распрацоўшчыкаў, яны не маюць ніякай справаздачнасці пра дзеянні карыстальніка ў гульні.
Гульню можна праходзіць падлеткам як самастойна, так і разам з дарослымі. Таксама Red Cap Must Cry можа стаць добрай нагодай абмеркаваць тэму бяспекі і асабістых межаў у сям’і.
Увосень 2024 плануецца выхад поўнай версіі гульні. Для яе рэалізацыі праект запусціў краўдфандынг з мярчом і асаблівымі прапановамі ад каманды і самога прадукту. Кожны зацікаўлены можа падтрымаць гульню і паскорыць яе паўнавартасны запуск.
У поўнай версіі карыстальнікаў чакаюць міні-гульні з новымі механікамі, новыя персанажы, і астатнія кіраўнікі гісторыі па кнізе.
Спампаваць гульню можна па спасылках: