Рускія, аграномы і сілавікі. Хто кіруе Віцебскай вобласцю

У Браславе — міліцэйскі начальнік, у Наваполацку — былы КГБшнік, у Паставах — сын памерлага старшыні. У большасці старшынь — сельскагаспадарчая адукацыя, у адзінак — эканамічная і настаўніцкая. Абсалютная большасць з іх — мужчыны. Але гэта яшчэ не ўсе цікавосткі.

PALATNO працягвае расказваць, хто кіруе ў беларускіх абласцях. На гэты раз зазірнём на Віцебшчыну.

Віцебскі аблвыканкам. Паразітолаг на чале

Віцебскай вобласцю кіруе Аляксандр Субоцін. Прызначэнне на пасаду старшыні Віцебскага аблвыканкама ён атрымаў у 2021 годзе.

Субоцін нарадзіўся ў 1976 годзе ў гарадскім пасёлку Руба на Віцебшчыне. У 1998 годзе скончыў Віцебскую дзяржаўную акадэмію ветэрынарнай медыцыны, яшчэ праз два гады атрымаў дыплом эканаміста ў Міжнародным інстытуце менеджменту. Субоцін працягнуў развівацца ў медыцынскім кірунку: напачатку 2000-х абараніў дыплом на тэму «Гельмінты сабак Беларусі і меры барацьбы з імі», працаваў выкладчыкам у Віцебскім ветэрынарным універсітэце.

У 2010-х Субоцін сыходзіць са шляху навукі, хоць і становіцца прафесарам і атрымлівае патэнт на кармавы дадатак для свойскіх жывёл. У 2014 годзе яго прызначаюць намеснікам начальніка галоўнага эканамічнага ўпраўлення адміністрацыі Лукашэнкі. А праз год у Субоціна ўзлёт па кар’ернай лесвіцы — ён становіцца намеснікам міністра сельскай гаспадаркі і харчавання.

У 2017 годзе Лукашэнка прызначае Субоціна сваім памочнікам па Віцебшчыне. У 2020 годзе яго робяць памочнікам па Магілёўскай вобласці, аднак на пасадзе ён прабыў менш за паўгода. У тым жа 2020-м, за месяц да прэзідэнцкіх выбараў, Субоціна прызначаюць намеснікам прэм’ер-міністра.

Віцебскі раён. Шлях ад інжынера ў калгасе

Генадзь Сабыніч нарадзіўся ў 1973 годзе ў вёсцы Шунеўцы Глыбоцкага раёна. У 1995 годзе скончыў Беларускую сельскагаспадарчую акадэмію, у сярэдзіне 2000-х атрымаў адукацыю ў Акадэміі кіравання.

Свой кар’ерны шлях пачынаў у якасці інжынера ў калгасе «Парыжская камуна» ў Глыбоцкім раёне. Затым яго прызначылі загадчыкам майстэрнямі. У 1997 годзе стаў галоўным інжынерам калгасу на Глыбоччыне. У 2001 годзе атрымаў пасаду дырэктара камунальнага ўнітарнага сельскагаспадарчага прадпрыемства «Лукомль» у Чашніцкім раёне. У 2006 годзе стаў першым намеснікам старшыні ў Сенненскім райвыканкаме. У 2012 годзе стаў намеснікам старшыні Віцебскага аблвыканкама.

Сабыніч быў прызначаны на пасаду старшыні Віцебскага райвыканкама ў 2016 годзе.

Віцебск. Настаўнік фізікі

Мікалая Арлова прызначылі кіраўніком Віцебскага гарвыканкама ў 2021 годзе. Арлоў нарадзіўся ў 1971 годзе ў Віцебску. Скончыў Віцебскі дзяржаўны інстытут па спецыяльнасці «фізіка і матэматыка», Віцебскі дзяржаўны тэхналагічны ўніверсітэт і Акадэмію кіравання.

Пасля заканчэння першага ўніверсітэта адслужыў у войску. Працаваў настаўнікам фізікі ў віцебскай школе, у якой пасля стаў намеснікам дырэктара па выхаваўчай працы. У 1998 годзе пайшоў на працу ў віцебскае аддзяленне БРСМ. У 2002 годзе яго прызначаюць кіраўніком сектара па справах моладзі ў Віцебскім гарвыканкаме. У 2005 годзе стаў начальнікам аддзела адукацыі адміністрацыі Кастрычніцкага раёна Віцебска. Паспеў папрацаваць намеснікам старшыні Віцебскага аблвыканкама. У 2009-м прызначаны кіраўніком адміністрацыі Першамайскага раёна Віцебска.

Наваполацк. Былы КГБшнік

У 2015 годзе Дзмітрыя Дзямідава прызначылі кіраўніком Наваполацкага гарвыканкама. Ён нарадзіўся ў 1975 годзе ў Полацку. У 1996 годзе скончыў Полацкі дзяржаўны ўніверсітэт.

Ад 1996 да 2003 года працаваў у дэпартаменце фінансавых расследаванняў Камітэта дзяржаўнага кантролю па Віцебскай вобласці. У 2003 годзе ўладкаваўся ў КГБ па Віцебскай вобласці. У 2010 годзе атрымаў прызначэнне на пасаду дырэктара наваполацкага жыллёвага рамонтна-эксплуатацыйнага аб’яднання. У 2014 годзе стаў выконваючым абавязкі старшыні Наваполацкага гарвыканкама.

Бешанковічы. Жанчына, якая «падымала» Глыбокае

Галіна Унуковіч нарадзілася ў 1976 годзе ў вёсцы Шыбекі ў Аршанскім раёне. Скончыла Віцебскі педагагічны ўніверсітэт і Акадэмію кіравання.

Пасля заканчэння Віцебскага педагагічнага Унуковіч пераехала ў Чашніцкі раён. Там яна адпрацавала ў сістэме адукацыі 14 гадоў. У 2010 годзе яе прызначаюць намесніцай старшыні Глыбоцкага райвыканкама. У 2014 годзе Унуковіч абіраюць старшынёй Глыбоцкага раённага аддзела Савета дэпутатаў. У афіцыйнай біяграфіі пішуць, што Унуковіч за гады на Глыбоччыне «шмат зрабіла для развіцца глыбоцкага краю: моцны штуршок у развіцці адбыўся ў адукацыі, ахове здароўя, у добраўпарадкаванні райцэнтра і сельскіх пунктаў».

Унуковіч прызначылі старшынёй Бешанковіцкага райвыканкама ў 2020 годзе.

Браслаў. Міліцэйскі начальнік у кіраўніцтве

Вячаслаў Грышчанка нарадзіўся ў 1972 годзе ў вёсцы Барань Віцебскай вобласці. Ён скончыў Беларускую дзяржаўную сельскагаспадарчую акадэмію і атрымаў дыплом па юрыдычнай спецыяльнасці. Яшчэ адзін пункт у адукацыі — Акадэмія МУС. Грышчанка пачынаў сваю кар’еру ў міліцыі: спачатку як участковы інспектар, а пасля даслужыўся да начальніка міліцыі грамадскай бяспекі УУС Віцебскага аблвыканкама.

Грышчанка паспеў папрацаваць міліцэйскім начальнікам і ў Браславе. Ад 2011 да 2018 года быў кіраўніком мясцовага аддзела ўнутраных спраў.

У 2021 годзе Грышчанку прызначылі старшынёй Браслаўскага райвыканкама.

Верхнядзвінск. Расійскі аграном

Васіль Шылаў нарадзіўся ў 1987 годзе ў вёсцы Панычава ў Томскай вобласці ў Расіі. Ён скончыў Беларускую дзяржаўную сельскагаспадарчую акадэмію і Беларускі дзяржаўны аграрна-тэхнічны ўніверсітэт.

Пачынаў кар’еру ў 2007 годзе як аграном. У 2008 годзе становіцца галоўным аграномам ААТ «Прудзінкі» ў Верхнядзвінскім раёне. У 2014 годзе ўзначаліў сельскую гаспадарку «Нурава». У 2017 годзе атрымаў прызначэнне на пасаду намесніка старшыні Верхнядзвінскага раёна.

Шылава прызначылі старшынёй Верхнядзвінскага райвыканкама ў 2019 годзе.

Гарадок. Настаўніца беларускай мовы, пяціразовая дэпутатка

Ірына Палякова нарадзілася ў 1979 годзе ў гарадскім пасёлку Карма ў Гомельскай вобласці. Скончыла Віцебскі дзяржаўны ўніверсітэт па спецыяльнасці «беларуская мова і літаратура», пазней — Акадэмію кіравання.

Працавала асістэнтам кафедры эканамічнай тэорыі і гісторыі Віцебскай дзяржаўнай акадэміі ветэрынарнай медыцыны, выхавальніцай у дзіцячым садку, ідэолагам у сельскай гаспадарцы, старшынёй віцебскай прафсаюзнай арганізацыі.

Палякову пяць разоў абіралі дэпутатам: тры разы ў Бабініцкі сельскі Савет дэпутатаў, два разы — у Віцебскі раённы Савет дэпутатаў.

Палякову прызначылі на пасаду старшыні Гарадоцкага райвыканкама ў 2023 годзе.

Глыбокае. Мёрскі чалавек

Аляксандр Шубскі нарадзіўся ў 1962 годзе ў вёсцы Новыя Двары ў Жабінкаўскім раёне. У 1987 годзе скончыў Гомельскі кааператыўны інстытут.

Пасля ўніверсітэта Шубскага размеркавалі ў Мёрскі раён. Яго амаль адразу прызначаюць намеснікам старшыні праўлення раённага спажывецкага саюза. Ад 1988 да 1997 года Шубскі ўзначальваў райспажыўтаварыства Мёршчыны.

Напачатку 2000-х Шубскі працаваў дырэктарам розных дзяржаўных прадпрыемстваў у Мёрскім раёне. У 2008-м яго прызначаюць на пасаду старшыні Расонскага райвыканкама. У 2017 годзе Шубскі вярнуўся ў Мёры на пасаду намесніка старшыні райвыканкама. Падчас працы ў Мёрах займаўся эканомікай рэгіёна.

У 2019 годзе Аляксандр Шубскі быў прызначаны старшынёй Глыбоцкага райвыканкама.

Дуброўна. Расійскі ветэрынар

Анатоль Лукашоў нарадзіўся ў 1960 годзе ў вёсцы Вялікі Бор у Бранскай вобласці. У 1982 годзе скончыў Віцебскі ветэрынарны інстытут, а ў 2006-м — Акадэмію кіравання. Ад 1982 да 1984 года служыў у савецкім войску ў Германіі.

У 1984 годзе стаў галоўным ветэрынарным доктарам саўгаса «Арловічы» Дубровенскага раёна. У 1996 годзе стаў кіраўніком калгаса «Герой працы» Дубровенскага раёна. У 2002 годзе быў прызначаны намеснікам старшыні райвыканкама ў Дуброўне. У 2005 годзе стаў старшынёй выканкама і адпрацаваў на гэтай пасадзе да 2016-га. Праз тры гады Лукашэнка зноў прызначыў яго на кіраўнічую пасаду.

Анатоль Лукашоў прызначаны старшынёй Дубровенскага райвыканкама ў 2019 годзе.

Лепель. Самы малады кіраўнік раёна

Міхаіл Кісялевіч нарадзіўся ў 1988 годзе ў Мінску. Паступаў у Горацкую сельскагаспадарчую акадэмію, але перавёўся ў Беларускі дзяржаўны аграрна-тэхнічны ўніверсітэт.

Пасля заканчэння ўніверсітэта працаваў у лясной гаспадарцы ў Лагойскім раёне. У 2013 годзе атрымаў прызначэнне на Лепельшчыну: спачатку кіраваў сортавыпрабавальнай станцыяй. У 2017 годзе Кісялевіч сыходзіць на пазіцыю намесніка старшыні Лепельскага райвыканкама.

Міхаіла Кісялевіча прызначалі старшынёй райвыканкама ў 2018 годзе.

Лёзна. Чалавек, які адказваў за харчаванне Віцебшчыны

Іван Фёдараў нарадзіўся ў 1976 годзе ў вёсцы Несцерава ў Мсціслаўскім раёне. У 1999 годзе скончыў Беларускую дзяржаўную сельскагаспадарчую акадэмію.

Пачынаў кар’еру ў якасці галоўнага агранома ў калгасе ў Талачынскім раёне. Затым адслужыў у арміі і стаў загадчыкам сектара па пытаннях ЖКХ у Аршанскім райвыканкаме. Ад 2002 да 2010 года працаваў на розных пасадах аграпрамысловага комплексу Магілёўскай і Віцебскай абласцей. У 2010 годзе Фёдарава прызначылі на пасаду намесніка старшыні Віцебскага аблвыканкама. У 2016 годзе стаў кіраўніком камітэта па сельскай гаспадарцы і харчаванню ў Віцебскім аблвыканкаме. Ад 2018 да 2022 года займаў пасаду намесніка гендырэктара ў віцебскім канцэрне «Мяса-малочныя прадукты».

Фёдарава прызначылі на пасаду старшыні райвыканкама ў 2022 годзе.

Мёры. Чалавек з таямнічай біяграфіяй

Ігар Кузняцоў займае пасаду старшыні Мёрскага райвыканкама ад 2009 года. У інтэрнэце амаль нічога няма з біяграфіі старшыні: ні даты нараджэння, ні месцаў вучобы і папярэдніх пасад.

Дакладна вядома толькі адно: на Віцебшчыне Кузняцоў кіруе райвыканкамам даўжэй, чым яго калегі.

Орша. Яшчэ адзін ветэрынар

Ігар Мароз нарадзіўся ў 1984 годзе ў Наваполацку. Скончыў Віцебскую дзяржаўную акадэмію ветэрынарнай медыцыны і Акадэмію кіравання.

Кар’еру пачаў з пасады намесніка старшыні сельскагаспадарчага комплексу ў Добрушскім раёне. Ад 2010 да 2015 года працаваў галоўным ветэрынарным доктарам Полацкай райветстанцыі. У 2015 годзе стаў намеснікам начальніка ўпраўлення сельскай гаспадаркі і харчавання Чашніцкага райвыканкама. Праз год ён узначальвае ААТ «Іванскі-Агра» ў Чашніцкім раёне.

У 2018 годзе сыходзіць у Лепельскі райвыканкам на пазіцыю намесніка старшыні. А ў 2020 годзе становіцца старшынёй Сенненскага райвыканкама.

Ігар Мароз прызначаны на пасаду старшыні Аршанскага райвыканкама ў 2023 годзе.

Паставы. Па слядах бацькі

Сяргей Чэпік нарадзіўся ў 1970 годзе ў вёсцы Баброва ў Лепельскім раёне. Скончыў Беларускую сельскагаспадарчую акадэмію і Акадэмію кіравання.

У 1993 годзе пачынаў кар’еру на Пастаўшчыне як начальнік рэгіянальнага сэрвіснага цэнтра па рэалізацыі і абслугоўванні трактароў «МТЗ». У 1995 годзе прызначаны дырэктарам ЗАТ «Паставы ГАЗ-УАЗ аўтасэрвіс». У 2005 стаў інжынерам па ахове працы і матэрыяльна-тэхнічным забеспячэнні сельскагаспадарчага кааператыва «Курапольскі», праз год узначаліў гэту гаспадарку. У 2015 годзе прызначаны намеснікам старшыні Пастаўскага райвыканкама.

Сяргей Чэпік стаў кіраўніком Пастаўскага райвыканкама ў 2017 годзе.

Бацька Сяргея Чэпіка, Васіль Чэпік, быў старшынёй гэтага ж райвыканкама ад 1987 да 2000 года. У 2000 годзе ён загінуў у аўтамабільнай аварыі.

Полацк. Інжынер з Верхнядзвінскага раёна

Іван Марковіч нарадзіўся ў 1960 годзе ў вёсцы Ніжняе Фаміно ў Верхнядзвінскім раёне. У 1982 годзе скончыў Беларускую сельскагаспадарчую акадэмію, а ў 2009-м атрымаў дыплом у Акадэміі кіравання.

У 1982 годзе трапіў на працу ў саўгас у Верхнядзвінскім раёне, дзе працаваў інжынер-механікам, інжынерам па тэхніцы бяспекі, загадчыкам майстэрнямі і галоўным інжынерам. У 1987 годзе стаў інструктарам сельскагаспадарчага аддзела, а затым інструктарам арганізацыйнага аддзела Верхнядзвінскага райкама КПБ Віцебскай вобласці. У 1990 годзе ўзначаліў упраўленне па абслугоўванню раённага аграпрамысловага комплексу Віцебшчыны. У 2003 годзе стаў гендырэктарам ААТ «Верхнядзвінскі аграсэрвіс». У 2007 годзе прызначаны старшынёй Верхнядзвінскага райвыканкама.

У 2019 годзе Марковіч атрымаў прызначэнне на пасаду старшыні Полацкага райвыканкама.

Расоны. Быкаў, ды не той

Уладзімір Быкаў нарадзіўся ў вёсцы Нурава ў Верхнядзвінскім раёне. Скончыў Беларускую сельскагаспадарчую акадэмію і Акадэмію кіравання.

Пачынаў кар’еру ў 1982 годзе кіроўцам у адным з мясцовых калгасаў. Пасля заканчэння сельскагаспадарчай акадэміі займаў розныя пасады на прадпрыемствах раёна. Ад 2008 года працаваў намеснікам старшыні Верхнядзвінскага райвыканкама.

Уладзімір Быкаў прызначаны старшынёй Расонскага райвыканкама ў 2017 годзе.

Сянно без кіраўніцтва

Пасля прызначэння Ігара Мароза старшынёй Аршанскага райвыканкама напрыканцы мая 2023 года ў Сенненскі райвыканкам дагэтуль не прызначылі кіраўніка. Пакуль выконвае абавязкі старшыні першы намеснік Андрэй Лебедзеў.

Лебедзеў нарадзіўся ў 1975 годзе ў Віцебску. Атрымаў ветэрынарную адукацыю. Працаваў у саўгасе, а затым служыў у МУС. Напачатку 2000-х стаў першым сакратаром віцебскага аддзялення беларускіх піянераў, а затым і БРСМ. Напачатку 2010-х працаваў на кіраўнічых пасадах на сельскагаспадарчых прадпрыемствах Віцебшчыны, а потым кіраваў некалькімі сельвыканкамамі рэгіёна.

У 2019 годзе стаў першым намеснікам старшыні Сенненскага райвыканкама.

Талачын. Старшыня з сельскагаспадарчым мінулым (але гэтым не здзівіш)

Алег Лындзін нарадзіўся ў 1965 годзе ў вёсцы Жалязкова ў Дубровенскім раёне. Скончыў Беларускую сельскагаспадарчую акадэмію і Акадэмію кіравання.

Пачынаў кар’еру ў 1987 годзе ў якасці галоўнага інжынера саўгаса ў Дубровенскім раёне. У 2002 годзе стаў кіраўніком саўгаса «40 год Кастрычніка». У 2010 годзе стаў кіраўніком ААТ «Якубава-Агра». У 2011 годзе стаў першым намеснікам начальніка ўпраўлення сельскай гаспадаркі і харчавання ў Дубровенскім райвыканкаме, а яшчэ праз пяць гадоў стаў там намеснікам старшыні.

Алег Лындзін прызначаны старшынёй Талачынскага райвыканкама ў 2019 годзе.

Ушачы. Селекцыянер і заатэхнік

Сяргей Садоўскі нарадзіўся ў 1983 годзе. Скончыў Віцебскую ветэрынарную акадэмію.

Пасля заканчэння вучобы працаваў селекцыянерам на прадпрыемстве ў Лепельскім раёне. Затым атрымаў прапанову на пасаду заатэхніка на «Палімір-Агра», нейкі час працаваў на кіраўнічай пасадзе ў сельскай гаспадарцы ў Чашніцкім раёне.

Перад прызначэннем ва Ушацкі райвыканкам тры гады адпрацаваў першым намеснікам старшыні.

Сяргей Садоўскі прызначаны старшынёй райвыканкама ў 2021 годзе.

Чашнікі. Ляснік з Віцебшчыны

Аляксандр Быкаў нарадзіўся ў 1977 годзе. Скончыў Беларускі дзяржаўны тэхналагічны ўніверсітэт са спецыяльнасцю, звязанай з лясной гаспадаркай.

Быкаў абіраўся дэпутатам райсавета ад Лепельшчыны, удзельнічаў ва Усебеларускім народным сходзе ў 2016 годзе. Перад прызначэннем у райвыканкам больш за дзесяць гадоў кіраваў сельскагаспадарчым філіялам «Заазер’е» ў Лепельскім раёне.

Аляксандр Быкаў прызначаны старшынёй Чашніцкага райвыканкама ў 2022 годзе.

Шаркаўшчына. Старшыня, які ўсё дарослае жыццё правёў у самым бедным беларускім раёне

Дзмітрый Ламака нарадзіўся ў гарадскім пасёлку Коханава ў Талачынскім раёне. Скончыў Беларускую дзяржаўную сельскагаспадарчую акадэмію і Акадэмію кіравання.

Пасля вучобы працаваў на кіраўнічых пасадах на сельскагаспадарчым прадпрыемстве ў Шаркаўшчынскім раёне. Ад 2012 года займаў пасаду намесніка старшыні райвыканкама ў Шаркаўшчыне.

Дзмітрый Ламака прызначаны старшынёй Шаркаўшчынскага райвыканкама ў 2017 годзе.

Шуміліна. Адзіны старшыня з эканамічным бэкграўндам у вобласці

Сяргей Галынчык нарадзіўся ў 1981 годзе ў вёсцы Ског у Сенненскім раёне. Скончыў Беларускі дзяржаўны эканамічны ўніверсітэт.

Працаваў вядучым спецыялістам у «Белдзяржстраху», у фінансавым аддзеле райвыканкама на Сенненшчыне. У выніку атрымаў прызначэнне на кіраўнічую пасаду ў сельвыканкам у Сенненскім раёне. У 2015 годзе стаў першым намеснікам старшыні райвыканкама ў Сянно.

Сяргей Галанчык прызначаны кіраўніком Шумілінскага райвыканкама ў 2021 годзе.